سەرکەفتن و سەرفەرازی بۆ گەلێ مە یێ خۆڕاگر ل ڕۆژئاڤایا کوردستانێ:
ئەم وەک زانکۆیا زاخۆ ناڤەندەکا ئەکادیمی ژ (مامۆستا، فەرمانبەر و قوتابی)، ب دلەکێ تژی ئێش و خەم و ب هەستەکێ نەتەوەی یێ بلند، چاڤدێریا وان ڕووداوێن دلتەزین و هێرشێن دژوار دکەین یێن کو ب سەر خوشک و برایێن مە یێن کورد ل ڕۆژئاڤایێ کوردستانێ دا هاتین.
ئەڤرۆ ئەم ل ڤێرە کۆمبووینە دا ب دەنگەکێ بلند بێژین: "ئێشا ڕۆژئاڤا، ئێشا زاخۆ و دهۆک و هەولێر و سلێمانیێ یە." ئەو هێرشێن دژوار یێن د نوکە دا دهێنە ئەنجامدان، نە تنێ هێرشن بۆ سەر ئاخ و خاکێ، بەلکو هێرشن بۆ سەر ناسنامە و هەبوونا گەلەکێ ئاشتیخواز کو چ جاران دەستدرێژی نەکریە سەر چ کەسان.
پەیاما مە بۆ خوشک و برایێن مە ل ڕۆژئاڤایا کوردستانێ:
هوین ب تنێ نینن! ئەگەر دوریێن جوگرافی مە ژ ئێک جودا بکەن، دلێن مە ب هەمان ژین و ژیان و ئازادیێ لێ ددەن. خۆڕاگری و قەهرەمانیا وە د بەرامبەر ڤان نەهامەتیان دا، وانەیا موکۆم و مەردینیێ یە بۆ هەمی جیهانێ. شەهیدێن هەوە، تاجێ سەرێ مە هەمیانن و برینێن وە، برینێن جەستەیێ مەنە.
داخوازیا مە وەک زانکۆ:
• بۆ جیهانێ و ڕێکخراوێن ناڤدەولەتی: ئەم داخواز دکەین ب زویترین دەم ب ئەرکێ خۆ یێ مرۆڤی و یاسایی ڕاببن بۆ ڕاگرتنا ڤان هێرشان و پاراستنا سڤیلان ژ دەربەدەری و کوشتنێ.
• بۆ گەلێ مە یێ خۆڕاگر: ئیرادەیا گەلان ژ چەکی ب هێزترە، و دیرۆکێ سەلماندیە کو ستەم چ جاران ل سەر حەقێ رەوا سەرنەکەفتیە.
سەربلندی بۆ شەهیدێن مە یێن نەمر..
ساخ و سلامەتی بۆ برینداران و گەلێ مە یێ ڕۆژئاڤا..
هەر بژیت کورد و کوردستان.